کابل طبي علومو پوهنتون د هرات ولایت له زلزله ځپلو سره نقدي مرسته وکړه.
له څو ورځو راهیسې په کابل طبي علومو پوهنتون او اړوندو تدریسي روغتونونو کې د هرات ولایت د زلزلې له قربانیانو او ټپیانو سره د خواخوږۍ او مرستې لپاره د مرستې را ټولولو صندوق پرانیستل شوی و. دغه نقدي مرستې چې نن سه شنبه د روان کال د تلې تر ۲۵ پورې د هرات ولایت له زلزله ځپلو سره د پوهنتون او اړوندو روغتونونو د کارمندانو له لوري د غم شریکۍ په موخه را ټولې شوې وې، د مالي او اداري مرستیال مولوي عبدالرحمن مرحوم او ټاکل شوي پلاوي په حضور سره وشمېرل شوې او ورسته لوړو زده کړو وزارت ته وسپارل شوې.
دا په داسې حال کې ده چې څو ورځې وړاندې په هرات ولایت کې د پرلهپسې زلزلو له امله زموږ زیات شمېر هېوادوال مړه او ټپیان شوي او هغوی ته ډېر زیانونه واوښتل چې د پوهنتون رهبرۍ، استادانو، کارمندانو او محصلانو د زلزلې ټپیانو او قربانیانو ته خپله خواخوږي څرګنده کړه او د لوی خدای(ج) څخه یې شهیدانو ته د فردوس جنت او ټپیانو ته د عاجلې شفا غوښتنه وکړه.
