ډاکټر خپل ژوند او روغتیا د نورو د روغتیا او ژوند لپاره له ګواښ سره مخ کوي
د کابل طبي علومو پوهنتون د کنفرانسونو په نمبر(۱) تالار کې د ډاکټرملي ورځ د یو لړ مراسمو په ترڅ کې د کابل طبي علومو پوهنتون رئیس، د پوهنتون علمي مرستیال، د پوهنځیو او تدریسي روغتونونو رئيسانو، د پوهنتون استادانو ، متخصصینو، محصلانو او ګڼ شمېر نورو کسانو په ګډون سره ولمانځل شوه.
په یاده غونډه کې د کابل طبي علومو پوهنتون رئیس پوهنیار دوکتور فضل الرحمن رحماني د ډاکټر ملي ورځې د مبارکۍ تر څنګ په خپلو خبرو کې د ډاکټرانو د زیار او هڅو ستاینه وکړه او ویې ویل: "ډاکټران د هر ډول ناروغیو د خطرونو سربېره خپل ژوند د نورو خلکو د روغتیا لپاره وقف او روغتیایي خدمات تر سره کوي څو خلک روغ او سالم ژوند ولري".
د غونډې په دوام د پوهنتون علمي مرستیال پوهاند دوکتور نجیب الله امرخېل ډاکټرانو ته د دغې ورځې مبارکي ورکړه او ویې ویل چې د ډاکټر ورځ باید د خلکو او ناروغانو لخوا د شانداره مراسمو په ترڅ کې ولمانځل شي او هڅې یې وستایل شي ترڅو ډاکټران لا تشویق شي او ښه روغتیایي خدمات وړاندې کړي.
وروسته د قلبي، وعایي هضمي ډيپارټمنټ استاد پوهاند دوکتور شمس الرحمن رحماني د ټولو ډاکټرانو او استادانو په استازیتوب په ټولنه کې د ډاکټر د مقام په اړه خبرې وکړې او په ملي کچه په ټول هېواد کې د د غې ورځې د لمانځلو وړاندیز یې وکړ.
په پای کې د کابل طبي علومو پوهنتون د دعوت او ارشاد آمر مولوي حبیب الله حماد د اسلام له نظره د ډاکټر د مقام په اړه خبرې وکړې او غونډه په اختتامیه دعا سره پای ته ورسېده.
