د کابل طبي علومو پوهنتون د نړیوال طبي ژورنال د جواز او ISSN نمبر اخیستلو لپاره د طبي ژورنال کمېټې غونډه ترسره کړه.
دغه کمېټه چې دوشنبه د روان کال د وږي پر ۲۰ د قرآن کریم څو آیاتونو په تلاوت سره د کابل طبي علومو پوهنتون سرپرست ډاکټر اسدالله نجات په مشرۍ او کمېټې د غړیو په ګډون پیل شوه، د نړیوال طبي ژورنال د جواز او ISSN نمبر اخیستلو د څرنګوالي، د مقالو نشر او له معتبرو نړیوالو سایټونو سره د دغه ژورنال نښلولو په اړه بحث او خبرې وشوې.
د پوهنتون سر پرست په دغه ناسته کې طبي نړیوال ژورنال د مقالو او څېړنو خپرولو لپاره د پوهنتون او هېواد اړتیا وبلله او ویي ویل چې د دغه ژورنال له لارې په طبي برخو کې د تر سره شویو فعالیتونو او څېړنو خپرول د سیمې او نړۍ په کچه مثبت پیغام رسوي. نوموړي زیاته کړه چې د دغه ژورنال د پراختیا او تقویې لپاره لازمه ده چې استادان او ډاکټران لا زیاتې څېړنې وکړي.
د غونډې په دوام د کمېټې غړیو د ژورنال په اړه د ترسره شویو فعالیتونو، د مقالو د نشر پر څرنګوالي، شرایطو، د ویب سایټ پر انډيکس، مالي او تخنیکي ستونزو په اړه هر اړخیز معلومات وړاندې کړل چې د پوهنتون سرپرست ژمنه وکړه چې د ستونزو د حل او د ژورنال د لا پراختیا په برخه کې به هڅې وکړي.
