د کابل طبي علومو پوهنتون«ابو علي ابن سینا» د استادانو چارو نوی آمر معرفي شو
نن شنبه د روان ۱۴۴۵هـ ق کال د محرم الحرام میاشتې پر ۱۸ نېټه د مایکرو بیولوژي ډيپارتمنټ استاد پوهنمل دوکتور محب الله صالح د پوهنتون علمي مرستیال پوهاند دوکتور نجیب الله امرخېل له لوري د استادانو چارو د نوي آمر په توګه معرفي شو.
د پوهنتون علمي مرستیال د پوهنمل صالح په پېژند غونډه کې د دغه برخې مخکیني آمر له فعالیتونو د ستاینې تر څنګ، پوهنمل صالح يو علمي، هڅاند او د پوهنتون په معیارونو برابر شخصیت و باله او هغه ته یې د بریالیتوب هیله وکړه.
پوهنمل صالح د کابل طبي علومو پوهنتون رهبرۍ له باور څخه مننه وکړه او هيله یې څرګنده کړه چې د پوهنتون د رهبرۍ او استادانو په همکاري د استادانو چارو په برخه کې ور سپارل شوي نوي مسوولیتونه به په ښه ډول سرته ورسوي.
پوهنمل دوکتور محب الله صالح د کابل طبي علومو پوهنتون له طب پوهنځي څخه فارغ او د میوند تدریسي روغتون د ماشومانو داخلې ډيپارتمنت د تخصص پروګرام کې شامل شوی او د تخصص دورې تر پای ته رسولو وروسته د مایکرو بیولوژي په ډيپارټمنټ کې د استاد په توګه مقرر شو.
