د لوړو زده کړو وزارت سرپرست، د دغه وزارت د استازیو لخوا د اسلامي ثقافت تدریس په موخه، په کابل طبي علومو پوهنتون کې غونډه جوړه کړه.
دغه غونډه چې نن یکشنبه د روان کال د وږي په ۱۲ نېټه د کابل طبي علومو پوهنتون مشرتابه، استادانو او محصلینو په ګډون تر سره شوه، د لوړو زده کړو وزارت سرپرست شیخ الحدیث مولوي نداء محمد ندیم د علم پراختیا او پرمختګ په اړه خبرې وکړې او ویې ویل چې اسلامي ثقافت د مسلمان انسان عبادات، اخلاق، ایمان او معاملات تضمینوي، هغه زیاته کړه: "هغه علم چې د شخص له اخلاقو، عباداتو او ایمان سره ارتباط ولري، فرض دی."
مولوي ندیم محصلینو ته په خطاب کې وویل چې ډاکټران د روغتیایي خدماتو وړاندې کولو تر څنګ په شریعت برابر او وطن، نظام او ملت ته ژمن وي.
د لوړو زده کړو وزارت د دعوت او ارشاد رئیس شیخ شاکر الله وحدت په کابل طبي علومو پوهنتون کې د اسلامي ثقافت د تدریس څرنګوالي او اهمیت ته د اشارې ترڅنګ په خپلو خبرو کې وویل چې دیني او عصري علوم دواړه غوره دي او اسلامي ثقافت د اقتصاد، سیاست، تجارت او ټولنې په تنطیم کې اساسي ونډه لري.
د غونډې په دوام د کابل طبي علومو پوهنتون علمي مرستیال او سرپرست رئیس ډاکټر اسد الله نجات د پخوانیو ډاکټرانو له ځانګړتیاوو چې د خپل مسلک تر څنګ د اسلام مبارک دین ته خدمت، پر ځان او نورو یې هم تطبیق کړی، یادونه وکړه او ویې ویل چې دوی هم انساني او هم دیني ارزښتونو ته ژمن وو. همدا راز ډاکتر نجات د هغه علمي پروګرامونو د جوړولو په اړه چې د پوهنتون د پرمختګ سبب کېږي، ژمنه وکړه.
دغه ناسته په داسې حال کې تر سره شوه چې د کابل طبي علومو پوهنتون محصلان د عصري زده کړو ترڅنګ دیني او عقیدوي زدهکړې هم تر لاسه کوي او په دغه مورد کې به د لوړو زدهکړو وزارت استازی په اونۍ کې یوځل د ثقافت مضمون په درسي ساعت کې د دغه پوهنتون محصلانو ته اسلامي ثقافت تدریسوي چې نن دغه لړۍ د شیخ نداء محمد ندیم لخوا پیل شوه.
