د سترګو په تدريسي روغتون کې د عينکو جوړولو څانګې په کار پیل وکړ
د کابل طبي علومو پوهنتون اړوند د سترګو په تدریسي روغتون کې د سترګو ناروغیو د درملنې ترڅنګ، په دې وروستیو کې مراجعینو ته د لا آسانتیاو برابرولو په موخه د عینکو جوړولو څانګه جوړه کړې او له یوې میاشتې راهیسې فعالیت کوي.
د سترګو تدریسي روغتون رئیس ډاکټر محمد بشیر عثماني وایي؛ چې د دې څانګې د جوړېدو موخه مراجعینو ته آسانتیا او روغتون ته د عوایدو زیاتوالی دئ. دی وایي؛ چې وړاندې تر دې په رغتون کې د عینک جوړول کومه څانګه نه وه، او د یو کال هڅو او کوښښونو په نتیجه کې دا څنګه فعاله او اوس مهال د ناروغانو لپاره خدمات وړاندې کوي.
د عینک جوړونې څانګې د مشر په وينا، د دې څانګې په فعالېدو سره ناروغانو ته ډېرې آسانتياوې برابرې شوې دي، او هره ورځ شاوخوا شل کسان د عینکو اخیستلو لپاره مراجعه کوي.
همداراز هغه ناروغان چې دغه روغتون ته مراجعه کوي د عینکو جوړولو د څانګې په فعالولو خوښي څرګندوي او دا یو ښه اقدام بولي.
دا په داسې حال کې ده، چې څه موده وړاندې په دغه روغتون کې د لس ميليونه افغانيو په ارزښت يو شمېر پرمختللي طبي وسايل واخيستل شول، چې د سترګو په ليزري عملياتو او نورو بېلابېلو څانګو کې ترې کار اخيستل کېږي.
