د خواشینۍ او ډاډ ګېرنې پیغام!
په ډېرې خواشینۍ سره چې د کابل طبي علومو پوهنتون استاد پوهنوال دوکتور عبدالغفار "همدرد" د چهارشنبې په ورځ مازدیګر مهال چې د روان ١٤٠٢ هـ ل کال د جدۍ میاشتې له شپږمې نېټې سره سمون لري د کابل ښار اتمې ناحیې اړوند کارته نو سیمه کې د خپلې شخصي معاینه خانې سره نیږدې د شخصي خصومت او دوښمنۍ له امله په شهادت رسیدلی دی.
پوهنوال دوکتور عبدالغفار همدرد د کابل طبي علومو پوهنتون یو له پیاوړو، فعاله او ځوانو استادانو له جملې څخه وو چې د جلدي ناروغيو متخصص او له څه مودې راهیسې د دغه پوهنتون د طبي زده کړو د پراختیا ریاست د سرپرست رئيس په توګه دنده هم ترسره کوله.
د کابل طبي علومو پوهنتون رهبري د پوهنوال عبدالغفار "همدرد" مړینه د هېواد د طبابت په برخه کې یوه لویه او نه جبرانیدونکې ضایع بولي، چې تشه به یې د تل لپاره د هېواد په طبي ټولنه کې محسوسيږي.
د کابل طبي علومو پوهنتون رهبري د پوهنوال عبدالغفار "همدرد" د شهادت په دې ستره غميزه او درانه غم کې د دوی له کورنۍ او خواخوږو سره ځان شريک بولي او د څېښتن تعالی له لوی درباره څخه ارواښاد استاد "همدرد" ته د فردوس جنت او د کورنۍ غړو او دوستانو ته يې د جميل صبر غوښتنه کوي.
اِناللهِ وَ ِانا اِلیه راجِعون
